Дали физичко лице треба да плати данок на личен доход по основ на продажба на недвижен имот-земјиште кое го стекнало по основ наследување од прв наследен ред?
Според член 58 од ЗДЛД, под капитална добивка се подразбира разликата помеѓу продажната и набавната цена при продажба или размена на недвижен имот, хартии од вредност, удели издадени од инвестициски фонд, учество во капиталот, друг подвижен имот и нематеријален имот.
Според член 59 од ЗДЛД, обврзник на данокот на доход од капитални добивки е физичко лице кое остварува добивка од членот 58 став (1) од овој закон.
Согласно член 60 став 1 од ЗДЛД, основа на данокот на доход од капитални добивки претставува разликата помеѓу продажната цена на недвижен имот, хартии од вредност, удели издадени од инвестициски фонд, учество во капиталот, друг подвижен и нематеријален имот и нивната куповна (набавна) цена.
Според член 61 од ЗДЛД, како продажна цена при продажба на недвижен имот се смета договорената цена, а доколку органот за јавни приходи оцени дека договорената цена е пониска од пазарната, како продажна цена се смета пазарната вредност на недвижниот имот, утврдена од страна на единицата на локалната самоуправа и Градот Скопје според Методологијата за процена на пазарната вредност на недвижен имот, без данокот на промет на недвижности.
Согласно член 63 став 1 алинеа 3 од ЗДЛД, данок на доход не се плаќа за капитална добивка остварена од продажба на недвижен имот, доколку обврзникот го продава недвижниот имот стекнат по основа на наследување од прв наследен ред.
Доколку остварениот доход од продажба на недвижниот имот (земјиште) потпаѓа под одредбите од член 63 став 1 алинеја 3 од ЗДЛД (односно обврзникот недвижниот имот – земјиште го стекнал по основ на наследување од прв наследен ред) истиот не претставува оданочив доход според одредбите од Законот за данок на личен доход и физичкото лице нема обврска да го пријави во Управата за јавни приходи.
Дали при продажба на земјиште од правно лице кое е регистрирано како ДДВ обврзник, кое претходно е набавено со купопродажен договор од физичко лице треба да се пресмета излезно ДДВ?
Согласно член 2 точка 1 од Законот за данокот на додадена вредност предмет на оданочување со данокот на додадена вредност е прометот на добра и услуги кој се врши со надоместок во земјата од страна на даночниот обврзник во рамките на неговата стопанска дејност.
Промет на добра во смисла на член 3 став 1 од ЗДДВ претставува преносот на правото на располагање со движен и недвижен материјален имот.
Според член 16 од ЗДДВ даночна основа на данокот на додадена вредност е вкупниот износ на надоместокот што е добиен, или што треба да се добие за прометот, во кој не е вклучен данокот на додадена вредност. Под надоместок се подразбираат пари, добра, услуги и други бенефиции според пазарната цена која ја плаќа или треба да ја плати примателот на доброто или корисникот на услугата или некое друго лице.
Во поглавје 37 став 5 од Упатството за примена на ЗДДВ е дефинирано дека прометот со неизградено земјиште не е ослободен од данок.
Данокот на додадена вредност се пресметува со примена на пропорционални стапки врз даночна основа за оданочивиот промет на стоки и услуги и увоз и тоа според општа даночна стапка од 18% и според повластена даночна стапка од 5%, според член 28 од ЗДДВ. Општата даночна стапка се применува врз целокупниот промет и увоз, освен врз прометот и увозот кој се оданочува со повластена даночна стапка, согласно член 29 од ЗДДВ, а поименично нормиран со одредбата од членот 30 од ЗДДВ. Прометот на замјиште не е нормиран со повластена даночна стапка и при промет на ова добро се применува општа даночна стапка од 18%.
Согласно напред наведеното при продажба на недвижниот имот (земјиштето), доколку правното лице кое го продава земјиштето е регистриран за ДДВ, во фактурата ќе треба да пресмета ДДВ со примена на општата даночна стапка од 18%.
