Согласно Законот за ДДВ македонски даночен обврзник (ДО) засметува обврска за ДДВ по основ на примена фактура за услуга од странски добавувач. Износот на ДДВ е платен. Поднесовме ДДВ пријава преку системот е-даноци на УЈП но за истата добивме одговор дека пријавата не е прифатена. Ве молам за инфо како да постапиме врска ДДВ пријавата која согласно Законот за ДДВ треба да ја поднесеме.
Согласно член 32 точка 4 од Законот за данокот на додадена вредност, даночен должник за данокот на додадена вредност е примателот на доброто или корисникот на услугата, доколку истиот е даночен обврзник или институција во смисла на член 10 став 1 од ЗДДВ, во случај на промет извршен од страна на даночен обврзник кој нема ниту седиште, ниту подружница во Република Македонија.
Во ваков случај, даночните обврзници од земјата, како приматели на доброто или корисници на услугата, се должни, наместо даночниот обврзник-резидент во странство, да го пресметаат, пријават и платат данокот кој настанал за прометот извршен спрема нив од странскиот даночен обврзник кај надлежниот даночен орган.
Даночните обврзници кои не се регистрирани според членот 51 од ЗДДВ, се должни како приматели на исполнувања да извршат пресметка, пријавување и плаќање на данокот. Обврската ги опфаќа како прометите извршени за цели на стопанската дејност, така и прометите за останатите области на делување на примателот на исполнувањето.
Даночниот обврзник-примател на исполнувањето е должен да стави забелешка на фактурата во врска со тоа кој износ на данок го долгува според член 32 точка 4 од ЗДДВ и да го плати данокот (член 6 од Правилникот за спроведување на ЗДДВ).
Ако данокот на додадена вредност го должи лице кое не е регистрирано за целите на ДДВ за промет извршен од даночен обврзник кој не е резидент во земјата, во тој случај постои обврска на поднесување на ДДВ пријава само за даночните периоди во кои се долгува ДДВ според член 32 точка 4 од ЗДДВ. Во ваков случај бидејќи даночниот обврзник не регистриран за целите на ДДВ, пријавата за ДДВ во системот ќе има статус на некомплетна пријава за регистрација која има грешки во однос на матичната евиденција и во искажаниот промет врз основа на кој треба да се изврши регистрација за ДДВ и истата ќе биде дополнително обработена од страна на Управата за јавни приходи.
Дали изминат рок на производите се смета за виша сила, па следствено, расходот настанат по тој основ се смета за оправдан, а истовремено не постои обврска за пресметка на ДДВ на вредноста на производите?
Кусокот, на добра, вообичаено се дефинира како недостаток на добра.
Овој недостаток на добра може да биде оправдан или неоправдан. Како неоправдан кусок, се смета губењето на добрата кое е предизвикано од невнимание, лошо чување или пак нестручно ракување. Кусокот кој настанува од непредвидливи дејствија (виша сила, провални кражби и воени судири), се дефинира како оправдан кусок. Овој кусок настанува како последица на виша сила, провални кражби и воени судири. За виша сила се смета елементарната непогода манифестирана како: земјотрес, поплава, порој, пожар, суша, луња, град, лизгање на земјиште и сл.
Од сето погоре кажано може да се заклучи дека кај кусок настанат под дејство на виша сила или провална кражба не постои предмет на оданочување, односно не постои промет кој е предмет на оданочување.
Кусокот, настанат под дејство на виша сила и друг непредвидлив настан се докажува со соодветна документација: записници на стручни комисии, специјализирани организации за контрола на квалитетот и квантитетот на добрата, документи на истражни органи, осигурителни заводи и слично.
Се она што преставува кусок предизвикан од неоправдани причини или во случаи кога тој не може документирано да се докаже, преставува предмет на оданочување со ДДВ и истовремено и непризнат расход за целите на ДД.
